Suportado ni City Mayor Rolando Klarex Uy ang sugyot balaodnon nga magwagtang sa political dynasty sa nasud.
Atol sa pagpakayab sa nasudnong bandila sa City Hall kagahapong adlawa, atubangan sa mga opisyal ug kawani, miingon ang mayor nga kon mapalabang ang Anti-Dynasty Bill, pasalamatan niya kini ug wala siyay bisan gamay nga pagsupak.
Matud pa ni Mayor Klarex, hinoon suportahan pa gayud niya ang maong panukala kon kini mahimong balaod.
Gipatin-aw usab sa Mayor nga kon mapasar ang sugyot balaodnon sa hawanan sa Kongreso, wala siyay pagduha-duha nga motuman niini tungod kay, sumala kaniya, nagtuman siya sa balaod sa kagamhanan.
Sa pagkakaron, padayon pang gituki sa Kongreso ang nahisgutang panukala aron mahingpit kini isip opisyal nga balaod sa nasud. (James Oliver)
