CAGAYAN DE ORO CITY – Dili mohawa sa iyang opisina si Kinoguitan Mayor Danilo Lagbas Jr bisan kon masilbi na ang duha ka bulan nga suspension batok kaniya gikan sa kapitolyo sa Misamis Oriental.
Kini human pirma na lang ni Provincial Governor Peter Unabia ang kulang aron isilbi ang preventive suspension batok Lagbas tungod sa kasong administratibo nga gihataga’g gimbug-aton sa Sangguniang Panalalawigan.
Namahayag si Lagbas nga e-depensa niya ang iyang katungod nga gihikaw kaniya sa Sangguniang Panlalawigan nga nagsilbing quasi judicial body samtang gidungog ang reklamong giduso ni Kinoguitan Vice Mayor Tomas Zarate.
Siya miingon nga dili problema kaniya nga isilbi ang suspension order apan nanganti kini nga dili lang mangahas ang kapitolyo nga hilabtan ang iyang kaugalingong opisina.
Kini tungod kay magpadayon siya sa iyang pagserbisyo sa katawhan sa ilang lungsod.
Una nang gipahamtanga’g silot sa SP-MisOr si Lagbas kay daw nagpasagad proteksyonan ang coral reef nga natandog sa gitukod nga pribadong pantalan sa maong lungsod sugod tuig 2019.
Apan alang kang Lagbas,taphaw ang maong reklamo ug hinoon giipit siya sa kapitolyo ilabina nga nadungog nga kini ang mosungag sa re-election ni Unabia sa 2025 elections.
