CAGAYAN DE ORO CITY-Emosyonal si City Mayor Oscar Moreno samtang gidumdom ang gibating kabalaka ni Presidente Rodrigo Duterte sa sitwasyon sa syudad human gihapak sa bagyong Vinta.
Sa iyang mensahe atol sa Rizal Day, nakahilak sa kalipay si Moreno tungod sa mainiton nga pag-abi abi kaniya ni Presidente Duterte ug pagkumusta sa sitwasyon sa syudad nga grabeng naapektuhan sa bagyo taliwala nga dili sila kapartido sa pulitika.
Mas misamot pa ang iyang gibating kalipay sa dihang gipangutana siya kon unsa ang iyang gikinahanglan.
Hisayran nga nalipay si Presidente Duterte human masayri nga zero casualty batok Vinta ang syudad bisan grabeng pagbaha nga nasinatian sa mga residente.
Samtang mi-sentro ang mayor sa iyang pagpasalamat sa stakeholders, volunteers, rescuers ug uban pa.
Gipasalamatan ni Moreno ang pagtinabangay sa publiko ingon man ang kaabtik sa mga personahe sa City Disaster Risk and Reduction Management Department sa pagresponde sa mga apektado sa baha.
Gidayeg usab niya ang gitukod nga Incident Management Team sa City Disaster Risk and Reduction Management Department pinaagi sa pagdumala sa ilang lider nga si retired Army Col. Mario Verner Monsanto.
Si Moreno miingon nga dako kaayo’g ikatabang ang IMT panahon sa disaster and calamities sa syudad ingon man sa panahon nga adunay big events sa dakbayan.
Gidayeg sa alkalde ang kaandam sa mga personahe sa pagresponde panahon sa mga emerhensiya.
