Gipahibalo sa tigpamaba sa ni City Mayor Uy nga si Janboy Actub nga nagpagawas og Executive Order Number 102 series of 2026 si Mayor Rolando Uy aron pagdaginot sa paggamit sa fuel ug kuryente sa lokal nga kagamhanan.
Sumala ni Actub, tumong sa maong kamandoan nga maminusan ang operational cost sa Cagayan de Oro City Government ilabi na sa konsumo sa krudo ug elektrisidad tungod sa nagpadayong tensyon sa Middle East nga posibleng makaapekto sa presyo sa enerhiya.
Gipatin-aw niya nga kabahin kini sa pagsunod sa panawagan sa nasyunal nga kagamhanan sa pagkonserbar sa enerhiya sa tanang ahensya sa gobyerno.Ubos sa maong executive order, gikinahanglan nga mahimong episyente ang paggamit sa mga sakyanan sa gobyerno ug likayan ang dili importanteng mga lakaw aron makamenos sa konsumo sa fuel.
Apil usab sa lakang ang pagminus sa paggamit sa kuryente sa mga opisina lakip na ang pagpalong sa aircon sa pipila ka oras sa udto ug paggamit na lamang sa electric fan ug suga kung gikinahanglan.
Gihimo ang maong lakang aron makatampo ang lokal nga kagamhanan sa panawagan sa nasyunal nga liderato nga magtinabangay sa pagkonserbar sa enerhiya samtang nagpadayon ang tensyon sa Middle East nga mahimong makaapekto sa ekonomiya. (by James Oliver)
