Aminado si Mayor Alexis Quina sa lungsod sa Balingasag, Misamis Oriental nga siya nadismaya sa kasamtangang porma sa Senado sa Pilipinas tungod sa nakita niyang kawad-on sa pagka-impartial sa mga senador atol sa mga pagdungog ilabi na karon sa impeachment trial ni Vice President Sara Duterte.
Gitandi sa mayor ang mga magbabalaod karon sa mga iladong senador kaniadto kinsa giisip niya nga mga modelo sa propesyonalismo.
Gipasabot ni Quina nga ang mga senador karon daw naglihok na lamang isip mga abogado sa partido sa prosecution o defense, nga maoy hinungdan sa pagkawala sa interes sa katawhan sa maong proseso.
Hinuon, gibarugan sa maong opisyal nga angayang ipakita sa mga magbabalaod nga sila patas gayod ug dili madala sa dili mao nga direksyon nga makapahuyang sa kredibilidad sa balay balaoranan.
