CAGAYAN DE ORO CITY – Pagpang-ipit gamit ang politika ang gitoohan ni Iligan City Mayor Frederick Siao kon nganong gikasuhan kini ni Iligan City Lone District Cong. Celso Regencia sa aspetong criminal ug administratibo sa Ombudsman Davao.
Kini human giakusar ni Regencia nga wala tiwasa sa administrasyon ni Siao ang katukuran sa sobra 590 milyones pesos nga Pala-o market sa maong syudad.
Gibutyag ni Siao nga dagha’g kahiwian nga nadiskobrehan sa maong proyekto rason nga adunay pagsusi niini aron dili madehado ang interes sa dakbayan itandi sa nagtrabahong mga kontraktor.
Namugos ang mayor nga dakong sayop usab ang pasiatab ni Regencia nga gipasagdan ang proyekto.
Gitahasan na ni Siao nga iandam ilang idason nga tubag oras nga mahuptan na niini ang kopya sa reklamo sa kanhi city mayor sa Iligan City.
Hisayrang kasong pagsupak sa Republic Act 3019 o Anti-Graft and Corrupt Practices Act ingon man grave of misconduct ug grave abuse of authority ang gisang-at ni Regencia kontra Siao sa Ombudsman Davao kagahapon sa buntag.
