Giaghat ni City Mayor Rolando Klarex Uy ang tanang vendors sa mga merkado sa syudad nga strikto nga imentinar ang kalimpyo sa ilang mga nataran ug pwesto.
Sumala ni Janboy Actub, tigpamaba ni Mayor Klarex Uy, tungod kay gitugotan ang mga vendors nga makabaligya sa ilang mga pwesto, responsibilidad usab nila ang pagpanlimpyo ug pagmentinar sa kahapsay sa ilang mga dapit.
Dumduman nga pipila na ka vendors ang nasampulan na sa syudad pinaagi sa temporaryong pagpaundang sa ilang pagpamaligya tungod sa paglapas sa kasabutan nga imentinar ang kalimpyo ug sundon ang mga patakaran ug abiso sa syudad.
Naghinaot si Actub nga mahimong leksyon kini sa tanang vendors sa Cogon Public Market, lakip na ang mga nagabaligya sulod sa merkado ug sa mga night market sa piling mga dalan sa syudad, nga dili abusohon ang higayon nga gihatag kanila sa kagamhanan.
Klaro usab nga dili magdumili ang mayor sa pagpahamtang og angay nga silot kung magpadayon ang paglapas ug makadaut na sa kalimpyo ug kalinaw sa ilang mga pwesto ug sa mga dalan. (James Oliver)
