CAGAYAN DE ORO CITY – Gitawag ni City Vice Mayor Jocelyn ‘Bebot’ Rodriguez nga mga ‘hakog’ ang mayoriya nga mga konsehales sulod sa konseho ning dakbayan.
Kini human nahimong tinubdan sa init nga panaglalis sa ilang 2nd regular session ang pagdali-dali sa mayoriya nga maangkon ang halos tanang komitiba ug napihig ang minoriya.
Gibutyag sa bise-mayor nga dili perpekto ang iyang pag-preside sa ilang sesyon tungo sa kabag-o pa niini sa maong tahas.
Apan namugos kini nga bintahan na lamang nga tudluan siya sa pagdumala sa sesyon kaysa dunay mga kauban niya sa konseho nga giingong midawat sa pipila ka pabor sa 19th city council.
Samtang giklaro ni ABC Federation President Kag Alam Lim nga wala siya mahangol nga magbaton sa chairmanship sa bisan unsa nga komitiba sa konseho ning dakbayan.
Kini ang tubag ni Lim human tawga ni Rodriguez ang mayoriya nga mga hakog sa gahom rason nga walay dagkong komitiba nahuptan ang minoriya.
Gibutyag ni Lim nga mismo ang majority coalition ang naghatag kaniya sa komitiba ug wala niya kini pangayua.
Giawhag na lamang sa konsehal ang minority nga mokuyog sa mayoriya aron sila saligan usab ug magbaton sa chairmanships sa mga komitiba sa konseho.
