(Update) CAGAYAN DE ORO CITY – Gikonsidera sa naporma nga special investigation task group sa Cagayan de Oro City Police Office ang kalabutan sa trabaho,pagsilbing driver taxi ug hayan may personal nga atraso kon nganong gipusil-patay sa motorcycle in tandem suspect ang komentarisa sa Radyo Natin FM nga si Federico ‘Ding’ Gempesaw sa tugkaran sa balay niini sa Brgy Carmen ning syudad.
Kini ang pag-angkon ni SITG spokesperson ug Carmen Police Station commander Maj Mario Mantala Jr nunot sa hingpit nang pagkalubong ni Gempesaw kagahapong adlawa.
Miingon si Mantala nga kabahin ang maong mga anggulo nga gitutukan sa SITG aron pagtuman sa mando ni Police Regional Office 10 regional director Brig Gen Benjamin Acorda Jr nga dinalian nga pagsulbad sa media killing ning syudad.
Si Gempesaw ang kanhi radio blocktimer sa pipila ka FM stations hangtod nga gi-absorb sa Radyo Natin nga ila nang kaugalingong empleyado.
Samtang dako’g ikatabang ang tanyag ni Misamis Oriental 2nd District Cong Bambi Emano kuyog sa partido Padayon Pilipino nga 500-mil pesos nga reward money alang sa mga tawong makatudlo sa tinud-anay nga utok sa kamatayon ni Federico ‘Ding’ Gempesaw.
Gibutyag ni Carmen Police Station commander Maj Mario Mantala Jr nga maka-engganyo kini nga lakang sa maong magbabalaod aron may mobarog nga mga testigo kabahin sa maong hitabo.
Giangkon ni Mantala nga may mga saksi na sila nga gihuptan ingon man natugyan na nila ang captured CCTV camera ug mga hulagway sa mga suspetsado nga gitugyan na nila sa Anti-Cybercrime Unit 10.
