Bisan pa sa managlahing political nga dapig, gitan-aw sa obhetibong panglantaw ni Stella Ferrarez, usa ka mental health advocate, ang pamatasan ni Ramil Madriaga atol sa impeachment proceedings batok kang Vice President Sara Duterte.
Butyag ni Ferrarez nga gi-analisa niya ang body language ug lihok sa testigo samtang naghatag og testimonya. Namatikdan matod pa niya nga si Madriaga nagpabilin nga kalmado, naka-focus sa iyang affidavit, ug direkta ang pagtubag sa mga pangutana nga walay paglikay o dili kinahanglang lihok.
Dugang pa niya, klaro usab nga konsistente ang mga tubag ni Madriaga ug nagpabilin ang eye contact sa mga miyembro sa komite nga nangutana, nga nagpakita sa iyang kahibalo sa iyang gisaysay.
Samtang adunay emosyon nga mipakita sa pagbasa sa affidavit, giingon ni Ferrarez nga kini natural lamang tungod kay, base sa sikolohiya, ang pagbasa usahay makapahinumdom sa personal nga kasinatian nga gilakipan sa testimonya.
Sa kinatibuk-an, gipahayag sa mental health expert nga ang pamatasan ni Madriaga sa maong hearing, kung basihan lamang ang obhetibong panlantaw, nagpakita siya og kaandam, kalinaw, ug diretsong paghatag og tubag atol sa imbestigasyon.
