Giawhag ni Stella Ferrarez, usa ka mental health advocate, ang mga ginikanan nga magpabilin nga lig-on ug musuporta sa ilang mga anak samtang nagsingabot ang pag-abli sa klase karong Hunyo 8.
Matud pa ni Ferrarez, ang pag-apil sa mga kalihukan sama sa Brigada Eskwela usa ka mahinungdanong paagi aron ipakita ngadto sa mga kabatan-onan ang hingpit nga suporta sa ilang pag-eskwela.
Gipasabot usab sa maong eksperto nga bisan pa sa mga hagit sa ekonomiya ug kakuwang sa mga panginahanglanon, angayan lang nga lantawon sa mga ginikanan ang nangagi nga mga tuig isip basehan nga kaya gayud nila kini nga malampasan.
Tambag niini nga dili angay magpa-stress og maayo ug huna-hunaon lamang ang mga epektibong pamaagi nga ilang gihimo kaniadto aron mahimong malampuson ang pagtuon sa ilang mga anak.
Dugang pa niya, pinaagi sa pag-atubang sa mga obligasyon nga hinay-hinay ug may kalmado nga panghunahuna, mas mapagaan ang palas-anon sa matag pamilya karong panahon sa krisis.
