CAGAYAN DE ORO CITY – Gitukod sa city govt ang mental health task force aron paspas makatubag sa mga kaso sa pipila ka indibidwal nga nagsagubang sa seryosong mga suliran nga mo-resulta sa mga paghunos kinabuhi.
Kini ang kabahin sa lakang ni City Mayor Rolando ‘Klarex’ Uy aron kapugngan ug dili na masundan ang dul-an napulo na ka kaso sa pagpanglukso sa pipila ka batan-o ug hamtong sa Marcos,Ysalina ug Kagay-an Bridges ning syudad.
Miingon si Uy nga nangulo sa maong task force si city administrator Atty Roy Raagas ug ang tanang local support groups alang sa maong katuyuan.
Hisayrang wala matago sa publiko nga may tulo ka batan-on na ang namatay ug ubay-ubay usab ang naluwas sa ilang pagpanglukso sa maong mga tulay tungod sa gihambing depresyon sa miaging mga semana.
