CAGAYAN DE ORO CITY – Dili ihikaw sa militar nga ihatag ang patay’ng lawas ni CPP-NDF Mindanao spokesperson Jorge Madlos alyas Ka Oris ngadto sa iyang pamilya nga nakabase sa Siargao,Surigao del Norte.
Kini kon makamatu-od lamang nga sila ang lehitimo nga kabanay sa top commander sa NPA nga napatay sa air ug ground assault nga gilusad sa militar sa Sitio Gabunan,Barangay Dumalaguing,Impasug-ong,Bukidnon sa miaging semana.
Gihimo ni 4th ID spokesperson Maj Francisco Garello Jr ang komento nunot sa pag-cremate sa lawas ni Ka Oris ingon man sa medic aide niini nga si Eighfel dela Peña alias Maui kay positibo sa COVID-19.
Gibutyag ni Garello nga pabiling gihatagan sa gobierno sa pagtahod ang dignidad isip tawo bisan kon mortal sila nga kaaway sa estado.
Samtang sa pikas bahin,gi-depensa sa 4th ID,Philippine Army ang paggamit sa mga eroplano sa Philippine Air Force aron bombahan ang lokasyon sa nabiling mga kauban ni Ka Oris.
Gibutyag ni Garello nga subay kini sa assessement sa ground troops tungod sa daghang land mines nga gipangbutang sa mga rebelde hinungdan sa paglusad sa surgical airstrike sa miaging gabii.
Sa pagkutlo usab ning balita,mi-aginod na ang ground troops aron pagsuta kon dunay nangamatay sa panig sa mga rebelde.
Samtang gikompirmar usab ni Garello nga anaa sa 30 ka pamilya ang napahikling nila tungod sa kakusog sa epekto sa mga bomba nga gigamit.
