CAGAYAN DE ORO CITY-Panguluhan mismo ni Task Force Bangon Marawi o chairperson Sec Eduardo del Rosario ang pagdumdom sa ikaduhang tuig sa pagka-atake sa Maute-ISIS sa Marawi Siege sa Mayo 23 ning tuiga.
Si Del Rosario miingon nga ubay-ubay ka aktibidad ang ilang giandam alang sa maong okasyon nga gilakipan sa panagtigom kauban ang Civil society groups ug Marawi sultanate league.
Siya miingon nga tumong ni Del Rosario nga mahibal-an kon unsa iyang matabang aron mapaspasan ang rehabilitasyon sa Marawi City.
Samtang gi-awhag ni Secretary General of Rights Group Bangsamoro National Movement for Peace Drieza Abato Lininding ang gobyerno nga ipaggawas ang tinud-anay nga kahimtang sa rehabilitasyon sa Marawi City.
Siya miingon nga gikapoy na sila’g hinulat sa hinay nga kalambuan sa gipahigayon nga clearing operations sa mga bomba sa ground zero.
Naglaum si Lininding nga seryosuhon na sa gobyerno ang rehabilitasyon aron subli na silang makabalik sa ilang tagsa-tagsa ka mga panimalay.
Una nang gibutyag ni Del Rosario nga imbitado ang international media sa pagdumdom sa ikaduhang tuig sa Marawi Siege aron masayran sa tibook kalibutan nga wala magpasagad ang gobyerno sa rehabilitation.
