CAGAYAN DE ORO CITY – Gibawian sa Police Regional Office 10 sa halos napulo ka tag-as ug mugbo nga armas ang security agency nga maoy nagbantay sa 900 ektaryang yuta nga nagsilbing plantasyon sa pinya sa Purok 18,Brgy Kiantig,Quezon,Bukidnon.
Kini human sudla sa mga pulis gikan sa Regional Civil Security Unit 10 ingon man sa Bukidnon PNP ug SOCO ang plantasyon nga gidumala sa usa ka Marco Lorenzo.
Gibutyag ni PRO 10 Director Brig Gen Benjamin Acorda Jr nga maoy gikuha-ag mga armas nga gilangkuban sa lima ka shotguns ug short firearms ang Adis Security and Control Risk Incorporated nga nakabase sa Davao City.
Namahayag ang heneral nga anaa sa 13 ka sekyu ang gipaubos sa imbestigasyon nunot sa pagkaangol sa upat ngadto unom ka sakop sa tribung Manobo nga misulod sa plantasyon aron kuhaon ang yutang kabilin sa ilang mga katigulangan sa miaging adlaw’ng Martes.
Samtang nakasupak sa election gun ban ang mga sekyu nga gitumbok sa tribung Manobo nga namusil kanila kay gikuha’g balik ang yutang kabilin sa lungsod sa Quezon,Bukidnon.
Kini ang nasuta ni Regional Civil Security Unit 10 commander Lt Col Gilbert Mendova III sa dihang gisudlan nila ang plantasyon nga gibantayan sa mga guwardiya.
Gibutyag ni Mendova nga lisensiyado ang mga armas apan walay Comelec ‘gun ban exemption ‘nga napakita ang agency.
Namiligro nga ma-rebokar ang mga lisensiya sa mga sekyu ug mismong agency gumikan sa maong hitabo.
Samtang walay pagpasalba apan gipuntarya gyud sa pipila ka sekyu ang ilang mga armas ngadto sa direksyon sa tribung Manobo kuyog ang grupo ni presidential candidate Ka Leody de Guzman hinungdan sa pagkaangol sa pipila ka sibilyan.
Kini subay sa bag-ong video footage nga gilugwa sa tribu aron pamatud-an nga bakak ang gisulti sa mga guwardiya nga igo ra sila nag-warning shots aron manghawa ang mga lumad sa maong luna.
Gibutyag sa samaron nga si Datu Didilusan Arroyo nga nabati kaayo nila ang pagsinggita sa mga sekyu aron sila ipapahawa sa lugar.Si Arroyo ang kabahin sa lima ka sibilyan nga naigo sa pagpamusil sa mga guwardiya.
