CAGAYAN DE ORO CITY-Dala ang paglaum nga madugangan ang nakuhang gold medal sa miaging Palarong Pambansa, biyaheng pa-Vigan City na ang mga atleta sa Northern Mindanao.
Magkasagol nga kalipay, kahadlok ug excitement ang gibati sa 475 ka atleta karong buntaga samtang sakay sa barko.
Matud ni City Schools Division Sports Coordinator- Rosalio Vitorillo nga target karon sa Northern Mindanao Regional Athletic Association nga tarungon ug ayohon ang performance sa mga atleta aron ilang malabwan ang ihap sa mga medalya nga ilang nakuha sa miaging Palarong Pambansa sa Antique sa tuig 2017.
Samtang giangkon ni Vitorillo nga gipangandaman sa mga atleta ang Palarong Pambansa 2018.
Siya miingon nga grabe nga pagbansay-bansay ang gihimo sa mga atleta tungod sa ilang pangandoy nga mosaka ang ilang ranking itandi sa miaging tuig.
Apan gitin-aw niini nga dili sila magkumpyansa ilabina nga nangandam usab ang ubang rehiyon.
Kahinumduman nga sa miaging tuig, 82 ka medalya ang nakuha sa Northern Mindanao sa Antique kun diin ilang nakuha ang 8th place sa overall ranking.
