CAGAYAN DE ORO CITY – Naghulat na ang cash incentives gikan sa panudlanang-lungsod ubos sa pagdumala ni Balingasag Mayor Atty. Alexis Quina alang sa mga atleta nga nagsilbing medalist sa 2024 Palarong Pambansa 2024 didto sa Cebu City.
Kini subay sa gisulti ni Quina pinaagi usab sa ilang municipal information officer Aljun Fermo kabahin sa ilang pagpadala’g 18 ka atleta gikan sa lungsod alang sa maong tinuig nga nasudnong-dula nga programa sa Department of Education o DepEd.
ISiya miingon nga anaa sa 20-mil pesos cash incentive ang dawaton sa atleta nga gold medalist, P15-K ang silver ug P10-K ang medalyang bronse.
Kabahin sa posibleng mahatagan cash maong cash incentives sila Chardoney Dion De Dios,12 anyos nga grade 6 pupil sa Talusan Elementary School nga gold medalist alang sa 800 meter run sa atheltics category.
Nagsilbi usab kining bronse medalist sa 400 meter run hurdlles.
Gawas kaniya, silver medalist usab ang laing atleta gikan sa Balingasag Central School nga grade 6 nga si Keith Marjorie Colita,13 anyos alang sa 100 meter dash.
Sa pikas bahin, giila usab nga gold medalist sa 800-meter run secondary boys si Erik Jay Pensahan gikan sa Sampatulog Intergrated School sa lungsod sa Alubijid,Misamis Oriental.
Sa latest overall medal tally sa Palarong Pambansa ning tuiga, ranked no.9 ang Northern Mindanao Regional Athletics Association (NMRAA) tungod sa nakuha niini nga 83 ka medalya nga gilangkuban sa 14 ka gold medals, 26 silvers ug 43 bronse.
Hisayrang sa taas nga panahon,kanunay sulod sa top 10 ang NMRRA delegation sa matag-lusad sa Palarong Pambansa.
