CAGAYAN DE ORO CITY – Dili na lang tumpangan ni City Mayor Rolando ‘Klarex’ Uy ang naghinobra nga pagka-bakakon sa iyang kanhi alyado sa politika nga si kanhi City Mayor Oscar ‘Oca’ Moreno.
Kini ang iyang tubag kabahin sa gipangugat ni Moreno nga dunay pagtugot gikan kaniya nga sipaon ang pagsilbing lider sa mayoriya ni Kag. Ian Mark Nacaya ug gipuli si Konsehal Edgar Cabanlas.
Miingon si Mayor Klarex nga dili niya kinaiya nga gapamakak sukwahi sa giingong permi buhaton ni Moreno sa katawhan sa dakbayan.
Sa pagkanaug ni Moreno ug pagsugod sa trabaho ni Klarex sa city hall,nagpakitang tawo pa sila pinaagi sa pagginaksanay ug paghinawiray sa ilang mga kamot aron ipakita sa publiko kon unsa sila ka lig-ong alyansa sa politika sa syudad.
Samtang direktang nasayod si Uy sa gidangatan nga pagkahukasi’g posisyon isip lider sa mayoriya ni Nacaya.
Kini maoy gibulgar ni Kag. Roger Abaday sukwahi sa gipamugos sa mayor nga wala siya’y kasayuran kon unsa man ang nahitabo sa miaging regular session sa konseho.
Miingon si Abaday nga tinood nga gawasnon sila sa konseho apan dili usab mosipyat nga ipahibalo ang mayor sa ilang mga natuki sulod sa sesyon.
Gani,dili sorpresa alang kang Nacaya nga kini gihukasan sa iyang katungdanan kay ilang nahisgutan ang maong lakang sulod sa majority meeting sa miaging semana.
Si Abaday ang tipik sa gitumbok ni Moreno nga giingong nagmaniobra aron magbaton sa bag-ong liderato ang konseho.
