CAGAYAN DE ORO CITY – Nakabalik na sa ilang pinuy-an ang 30 hangtud 40 ka residente nga namakwit tungod sa engkwentro tali na sa militar ug mga rebeldeng New Peoples Army o NPA sa Magayad Creek, Brgy Pigsag-an ning syudad.
Kini ang kumpirmasyon nga gihimo ni Pigsag-an Punong Brgy Sonny Rondahan sa pakighinabi sa Bombo Radyo.
Si Rondahan miingon nga iyang gipahimangnuan ang mga residente nga magbinantayon ug gilayon nga i-report sa mga otoridad kon ugaling aduna sila’y mamatikdan nga katingad-an sa ilang lugar.
Una nang gikompirmar ni Rondahan ang duha ka oras nga engkwentro tali na sa 65IB,Philippine Army ug NPA nga gikaangol sa usa ka sundalo sa miaging adlaw.
Samtang gikompirmar ni 103rd Infantry Brigade commander Brigadier General Romeo Brawner nga padayon ang ilang combat operations batok sa mga rebeldeng New Peoples Army o NPA nga ilang na-engkwentro sa Lumba Bayabao,Lanao del Sur.
Gibutyag ni Brawner nga hugot ang koordinasyon sa tanang tropa sa militar ubos sa ilang hurisdiksyon sa paglakag sa mga nakasibat nga NPA.
Una niini, nabawi sa tropa sa 49th IB,Philippine Army ang kampo sa rebelde nga nagsilbing medical training facility nga gikaangol sa duha ka sundalo.
Na-engkwentro usab sa 65th IB, PA ang splinter groups sa walhong grupo sa Brgy Pigsag-an ning syudad nga gikaangol sa duha ka sundalo.
