CAGAYAN DE ORO CITY – Hinay-hinay na nga nakabalik sa ilang mga pinuy-anan ang mga residente nga temporaryong nagpasilong sa evacuation centers human makasinati sa grabeng pagbaha tungod sa bagyong Falcon sa Lanao del Norte.
Miingon si Lanao del Norte Provincial Information Office spokesperson Lyndon Calica nga ilang paningkamutan nga makabalik ang kapin 10,000 ka residente gikan sa lima ka munisipalidad nga apektado sa dautang panahon.
Misaka pa sa 159 ka pamilya kon 816 ka indibidwal ang nagpasilong sa mga pampublikong tunghaan ug barangay covered courts sa munisipalidad sa Salvador, 97 ka pamilya sa Sultan Naga Demaporo, 643 sa Sapad, 511 kon 1,673 ka indibidwal sa Lala ug pinakadaghan sa Kapatagan nga miabot sa 1, 673 ka pamilya o 6,025 ka indibidwal.
Samtang wala pay mahatag nga damyos ang Office of the Civil Defense Northern Mindanao sa pagbaha nga nasinatian sa lima ka munisipalidad sa Lanao del Norte.
Gibutyag ni OCD-10 Regional Director Rosauro Arnel Gonzalez nga maoy ilang prayoridad karon ang kahimtang sa mga bakwit nga naggikan sa munisipyo sa Salvador, Sultan Naga Demaporo, Sapad, Lala ug Kapatagan.
Si Gonzales miingon nga ilang himoon ang damage assessment kon ugaling makabalik na sa ilang pinuy-anan ang mga bakwit ug molurang na ang baha sa mga apektadong lugar.
