PC Kierk Ciervo
CAGAYAN DE ORO CITY-Gitay-og sa 5.0 magnitude nga linog ang dakong bahin sa Northern Mindanao kagahapon sa hapon.
Gibutyag ni Philvocs regional director Marcial Labininay nga nakit-an ang sentro sa tectonic in origin nga linog sa Brgy Indulang,Talakag,Bukidnon.
Mitala sa intensity IV ang lungsod sa Talakag samtang nabati usab kini sa magkalahing gingkusgon sa Libona,Manolo Fortich,Kalilangan, Valencia City;El Salvador City,Tagoloan,Villanueva ug Iligan City,Lanao del Norte.
Natala usab ang mga aftershocks sa pipila ka bahin sa Bukidnon hangtod ning panahona.
Samtang nakaangkon sa pagkaguba ang pipila ka gambalay sa gobierno ingon man simbahan sa pagtay-og sa 5.0 magnitude nga linog.
Kini human grabeng apektado dihang natala ang intensity IV ang miigo sa maong bahin sa lungsod kagahapon sa hapon.
Gikompirmar ni Raydan Gayao,head sa local disaster risk reduction and management office nga may 12 ka pinuy-anan na ang totally damage ug daghang pamilya ang mibakwit.
Gani,gisudlan usab nila ang Brgy San Rafael ug Tigkalaan nga unang gika-report nga adunay natala nga damyos.
Dili pa usab makompirmar ni Dayao ang mga report diin may pipila ka residente ang naangol kay nahulugan sa debris gikan sa mga apektadong gambalay.
