CAGAYAN DE ORO CITY-Gikalipay ni Provincial Election Supervisor Atty Carlito Ravelo ang malinawon nga unang adlaw sa pagduso sa sertipiko de kandidatura kagahapong adlawa.
Matud ni Ravelo nga walay mga kagubot nga natala sa tibook Misamis Oriental gawas lamang sa mga minor incidents sama sa gusto magpapili nga under age ug aduna poy uban nga nahutdan sa documentary stamps.
Giasoy usab sa opisyal nga base sa talaan ni Ravelo, anaa sa 1,536 sa tibook Misamis Oriental ang nakaduso sa ilang sertipiko de kandidatura kagahapong adlawa.
Samtang mahibal-an sunod semana sa Comelec ang mga lugar sa tibook Rehiyon-10 nga ipaubos sa ‘areas of concern” kalabot na sa nagkadool nga Barangay ug SK elections sunod bulan.
Kini ang giasoy ni Ravelo atol sa tulumanon nga Good Morning Philippines (GMP).
Sya miingon nga kinahanglan pang e-verify sa intelligence personnel sa PNP ug AFP ang mga lugar nga posibleng adunay mga bahad sa umalabot piliay.
Hisayran nga subling magtagbo ang Comelec, AFP ug PNP aron hisgutan ang dugang pagpangandam sa umalabot piliay.
Nagtoo usab si Ravelo nga posibleng molungtad lang sa duha katuig ang termino sa mga modaug sa Barangay ug SK elections.
Sumala pa ni Ravelo nga naapektuhan ang 3 year term sa mga modaug nga opisyal tungod sa pagka-oktaba sa miaging piliay.
Asoy pa niini nga adunay gisunod nga balaod ang ilang ahensiya ilabina kung hisgutanan ang calendar of activities sa piliay.
Hisayran nga duha katuig karon ipahigayon na usab ang national elections.
