CAGAYAN DE ORO CITY – Nagbahad si Mindanao Container Terminal o MCT collector John Simon nga iyang ilakip pagsulod sa container van ang mga responsable sa paglabay sa basura diha sa Tagoloan,Misamis Oriental.
Kini kon ugaling masapon ug makita ni Simon ang mga opisyal sa Verde Soko sa dili pa matapos ang eksportasyon sa last batch sa mga basura Pebrero 9 ning tuiga.
Gipanganti ni Simon nga madugangan ang ihap sa mga malata sa prisohan kay ilang dugangan ang mga opisyal nga kasuhan sa korte.Hisayran nga napabalik na sa 60 ka container vans sa mga basura pabalik South Korea pinaagi sa simpli nga seremonya sa MCT kagahapon sa buntag.
Samtang gipasigarbo ni Simon nga wala milampos ang mga opisyal sa Verde Soko Philippines Industrial Corporation sa tinguha nga mapugngan ang pagpabalik sa mga basura sa South Korea.
Kini human unang mihimo’g mga lakang ang maong grupo nga i-sabotahe ang mga basura sama sa pagpakawat ug pagpasunog niini sa miaging tuig.
Dugtong niini, nanawagan si Simon sa publiko nga mag-maigmat ug magbinantayon aron dili na mahimong labyanan sa mga basura gikan sa laing kanasuran ang Misamis Oriental.
Samtang nadismaya si Misamis Oriental Provincial Board Member Gerardo Sabal III ngadto kang Phividec Administrator Atty Franklin Quijano.
Gibutyag pa ni Sabal nga nalipay sila dihang naglaraw ang Verde Soko Philippines Industrial Corporation nga mamuhunan sa Misamis Oriental sa pagtoo nga plastic waste recycling ang maong kompaniya.
Siya miingon nga nagsalig sila sa Phividec nga maoy nag-inspection sa background sa Verde Soko.
Una nang gipamugos ni Quijano nga wala kanila ang pagpugong sa mga kargamento apan tahas kini sa Bureau of Customs ug ubang ahensiya sa gobierno.
Sa pikas bahin,gidayeg sa grupong Eco-Waste Coalition ang nagkadaiyang local govt units nga naningkamot nga mapabalik sa hingpit ang mga basura nga gipalusot sa Verde Soko Philippines diha sa lungsod sa Tagoloan,Misamis Oriental.
Kini human nagkatibangay sa lain-laing paagi sila si Gov Bambi Emano,Misamis Oriental 2nd District Rep Juliette Uy ug Tagoloan Mayor Enan Sabio maabagan lamang ang Bureau of Customs sa maong problema.
Gibutyag ni Chinkie Peliño Golle, representative eco-waste coalition nga nagpakita lamang kini nga may lig-ong political will ang mga opisyal, busa,nahingusgan niini ang pagpabalik sa mga basura.
Gidayeg usab ni Golle ang katawhan sa Northern Mindanao tungod sa pagkamabinantayon niini nga dili mahimong basurahan sa ubang nasud.
