CAGAYAN DE ORO CITY-Nangayog’ dugang ayuda sa mga pundok nga dako’g kasingkasing sa pagtabang ang dul-ag 270 ka residente nga biktima sa sunog sa Brgy Puerto sa syudad.
Kini bisan nga halos nagdungan-dungan na’g abot ang mga ayuda gikan kanila ni City Mayor Oscar Moreno ug Gov Bambi Emano alang sa mga 67 ka pamilya nga nawad-ag pinuy-anan.
Miingon si Mrs Charry Micabalo, CSWD worker nga gikinahanglan sa mga biktima ang personal hygeine kits sama sabon, toothbrash, tootpaste ug underwears.
Dugtong niini, gitigom usab sa CSWD ang brgy officials kauban ang mga biktima aron mahan-ay ang angay himoon samtang gihulat ang ayudang pinansyal gikan sa syudad.
Samtang mihangyo ang Bureau of Fire Protection o BFP sa publiko nga dili magpasagad sa seguridad batok pag-ulbo sa mga sunog.
Kini tungod kay dako’g peligro ang dala sa maong trahedya sama sa nahitabo nga kamatayon ni Edwin Ca-el nga naapil pagka-sunog sa Brgy Puerto kagahapong adlawa.
Miingon si BFP District Fire Marshall Supt Richard Arbutante nga ang kaalerto pinaagi sa gilayong pagtawag kanila ang pinaka-maayong alkontra aron masumpo kon matigayon ang dakong sunog.
Naglisod ang mga bombero sa pagpalong sa kalayo sa Brgy Puerto tungod sa sobra kagamay sa mga agianan hinungdan sa pagkasunog sa 50 ka pinuy-anan.
