CAGAYAN DE ORO CITY-Gitin-aw sa Department of Interior and Local Government (DILG) nga adunay katungod ang mga barangay opisyal nga subling magpapili sa Barangay ug SK elections taliwala paman nga nalambigit kini sa paggamit sa ilegal nga droga.
Si Provincial Director Edward Bhagwani miingon nga mahimong magpapili ang bisan kinsa kung dili konbiktado sa usa ka salaod.
Tungod niini, gibutyag ni Bhagwani nga anaa sa mga kamot sa botante ang pagpili sa mga tarong nga opisyal hinungdan nga mahinungdanon ang ilang kooperasyon.
Samtang naglaum si Bhagwani nga pinaagi sa ilang kampaniya nga Matino, Mahusay at Maasahang Barangay ug SK Officials, mahinuklogan sa mga botante ang pagpili sa mga maayo nga lider sa ilang tagsa-tagsa ka mga barangay.
Matud ni Bhagwani nga kinahanglang pilion sa mga botante ang mga opisyal nga dili corrupt, adunay maayo nga plataporma ug adunay plano sa kalambuan sa ilang lugar.
Hisayran nga gihimo kini nga programa sa gobyerno aron matabangan ang mga botante nga makapili sa ilang maayo nga lider.
