CAGAYAN DE ORO CITY-Miduso na sa ilang Certificate of Candidacy (COC) ang partido National Unity pinangulohan ni kanhi Vice Governor Julio Uy kinsa magpa-pili pagka-gobernador ug incumbent Board Member Jigjag Pelaez kinsa mopa-pili usab pagka-bise gobernador sa Misamis Oriental.
Miduso usab sa iyang kandidatura pagka-kongresista sa unang distrito sa probinsya si incumbent Vice Governor Joey Pelaez samtang magpa-subli sa ika-duhang distrito si incumbent Congresswoman Juliette Uy.
Lakip sa miduso sa ilang kandidatura ang upat ka kandidato pagka-board member sa unang distrito ug lima ka kandidato sa ika-duhang distrito sa lalawigan.
Samtang miduso usab sa ilang COC sila si incumbent Governor Bambi Emano kinsa magpa-subli pagka-gobernador alang sa iyang ika-tulong termino ug President Elipe kinsa mopa-pili usab pagka-bise gobernador sa lalawigan.
Lakip sa miduso sa iyang kandidatura ubos sa Partido Pilipino si Christian Unabia pagka-kongresista sa unang distrito samtang si kanhi Cagayan de Oro Congressman Benjo Benaldo mopa-pili usab pagka-kongresista sa ika-duhang distrito sa lalawigan.
Dunay kompleto usab nga line-up ang hugpong ni Emano pagka-board member sa una ug ika-duhang distrito sa lalawigan.
Samtang nag-inusarang miduso usab sa iyang certificate of candidacy si kanhi Congressman Augusto “Jun” Baculio pagka-kongresista sa ika-duhang distrito sa Misamis Oriental ubos sa partido PDP Laban.
