CAGAYAN DE ORO CITY – Gipasalamatan sa Cagayan de Oro City Police Office o COCPO ang tanang sektor nga mitabang sa kapolisan sa pagbantay sa ‘traslacion’ sa itom nga nazareno dinhi sa dakbayan kaganinang buntag.
Miingon si COCPO Spokesman Lt. Col. Evan Vinas nga dili mahimong ‘generally peaceful’ ang prosisyon kon wala ang suporta ug kooperasyon sa katilingban sa ilang gipatumang security measures.
Apan namahayag si Vinas nga ilang namatikdan ang pag-minus sa ihap sa mga deboto nga miduyog sa ‘traslacion’ tungod sa pagbundak sa ulan.
Asoy ni Vinas nga dili mominus sa 50-mil ka deboto ang mi-uban sa prosisyon diin kini mas ubos itandi sa ilang natala niadtong tuig 2020.
Duha ka tuig nga gikansilar ang traslacion sa Black Nazarene sa tuig 2021 ug 2022 tungod sa pandemya.
Samtang giangkon ni Vinas nga naglisod sila pagpatuman sa COVID-19 health protocols atol sa ‘traslacion’ sa itom nga nazareno.
Miingon si Vinas nga wala gayud masunod ang ‘physical distancing’ tungod sa pagdugok sa mga deboto.
May mga deboto usab nga mipulas sa ilang su-ot nga face masks gumikan sa pagbundak sa ulan.
Apan namahayag si Vinas nga wala sila nagkulang sa pag-abiso sa mga deboto nga protehiran ang ilang kaugalingon batok sa bayrus.
Samtang wala panumbalinga sa deboto nga si Eliza Richmond Llana nga taga Apovel Subd., Brgy. Bulua ang pagbundak sa ulan, maka-uban lamang sa ‘traslacion’ sa Black Nazerene.
Sa pakighinabi sa Bombo Radyo, gibutyag ni Mrs. Llana nga hugot ang ilang pagtoo sa itom nga nazareno kay wala mibati’g kalisod ang iyang pamilya sukad misugod ang ilang debosyon sa tuig 2009.
Dugang ni Llana nga gumikan sa ilang debosyon, natuman ang pangandoy sa iyang anak nga maka-trabaho sa Canada.
Samtang gi-asoy sa usa ka architect student sa Bombo Radyo ang kasinatian sa iyang pamilya sukad sila mi-uban sa ‘traslacion’ sa itom nga nazareno dinhi sa dakbayan.
Miingon si Gweneth Ladao nga taga Brgy. Carmen nga mi-absent siya sa iyang klase aron lamang makaduyog sa traslacion taliwalang mibundak ang ulan.Gisaysay niini nga tungod sa pag-ampo sa iyang igsoon sa Black Nazarene, nakasulod kini sa trabaho.
Asoy pa ni Ladao nga gumikan sa ilang debosyon, nahanaw ang gihambin nga balatian sa iyang amahan ug inahan.
