Gikompirma ni DepEd Undersecretary Malcolm Garma nga anaa na sa Prosperidad, Agusan del Sur ang mga delegado nga moapil sa ika‑60 nga Palarong Pambansa ning tuiga alang sa nagkadaiyang kalihokan sa nasudnong patimpalad sa sports.
Matud sa kalihim, nakaabot na usab sa lugar ang mga delegado gikan sa nagkadaiyang rehiyon ug mga partner nga kabahin sa preparasyon alang sa opisyal nga pagbukas sa torneyo ugma.
Dugang pa niya nga andam na ang mga organisador sa pagsugod sa opening program nga gikatakdang ipahigayon ugma.
Gipadayag usab ni Garma nga halos 100 porsyento na ang kahimtang sa mga billeting quarters, mga pasilidad ug mga venues nga gamiton sa kompetisyon.
Gidugang pa sa kalihim nga anaa na sa maayong kahimtang ang grandstand ug uban pang lugar nga pagahimuan sa mga kalihokan, base sa katapusang inspeksyon sa wala pa ang opisyal nga pagsugod sa Palarong Pambansa.
