Mga drayber sa motorela nga dili magsukli sa plitehan, maka-angkon og kaangayan nga silot sa RTA

Giawhag sa Roads and Traffic Administration sa Cagayan de Oro ang publiko nga ireport dayon ang mga abusadong drayber ug operator sa motorela nga dili magsukli sa husto nga plitehan sa dakbayan.

Namahayag ang Department Manager sa ahensya nga si Benedicto “Doy” Ramiro nga kinahanglang timan-an sa mga pasahero ang body number sa sakyanan, rotang gibyahean, ug kompletong detalye aron opisyal nga mapatawag sa ilang opisina.

Ang maong illegal nga lakang giisip nga dakong supak sa lisensya ug prangkisa diin pwede kining i-endorso sa Business Permits and Licensing Division ug sa Land Transportation Franchising and Regulatory Board para sa pagbawi sa permit.

Hiniusang pahinumdom sa opisina nga mohatag sila og citation ticket ug magpasaka og legal nga aksyon sa bisan kinsang drayber nga magpataka og tingil sa komyuter.