“Nagkakaisang Kapuluan” o United Archipelago.
Kini maoy tema alang sa 65th Palarong Pambansa, nga opisyal nga gibuksan ni Presidente Bongbong Marcos, didto sa Ferdinand E. Marcos Memorial Stadium, Laoag, Ilocos Norte.
Sa iyang pag-atubang sa mga batan-ong atleta gikan sa 18 ka rehiyon sa Pilipinas, iyang gi-awhag ang matag usa nga balansehon ang paningkamot sa pagtuon ug pagsalmot sa isports.
Gidayeg ni Presidente Marcos ang dedikasyon ug paningkamot sa matag atleta ilabe na nga dili basta-basta ang ilang kaagi sa pagdungan sa pagtungha ug paghatag panahon sa ilang pagbansay-bansay aron makasulod sa Palarong Pambansa.
Sama sa gilauman, gisaad sa presidente nga dili mulubad ang pagtunol sa suporta gikan sa gobyerno alang sa mga atletang pinoy nga nangindahay nga makalahos sa international tournaments sama sa pagtambong sa LA Olympics 2028.
Hisayran nga ning tuiga anaa sa kapin 15,760 ka delegado gikan sa 18 ka rehiyon sa nasud ang misalmot, kundiin ang mga atleta magkompetensya sa 32 ka sports.
Highlight sa palaro ang basketball, football, swimming, gymnastics, arnis, ug athletics nga ipahigayon sa 8 ka lungsod ug 2 ka siyudad sa Ilocos Norte.
Kagahapon, opisyal nang gisugdan ang kompetisyon sa nagkalain – lain nga sports.
Tak-upan ang palaro sa Mayo 21.
