CAGAYAN DE ORO CITY – Gigukod sa militar ang 14 ka sakop sa rebeldeng New People’s Army o NPA nga responsable pagsunog sa bus ug tulo ka trak nga gipanag-iya sa Del Monte Philippines sa Barangay Tipolohan,Claveria,Misamis Oriental.
Miingon si 58th IB,Philippine Army commander Lt Col Ricky Canatoy nga padulong mananom sa similya sa pinya ang mga biktima dihang kalit miatake ang mga rebelde ug misunog sa maong mga sakyanan.
Nagtoo si Canatoy nga tuyo lamang mosabwag sa kahadlok sa katawhan ang mga rebelde ilabina nga dunay engkuwentro nga natigayon sa maong lugar sa miaging Setyembre ning tuiga.
Hinoon,walay pasakiti sa mga rebelde ang mga sibilyan nunot sa hitabo.
Samtang dako ang porsiento nga masulbad ug paspas makasuhan ang NPA rebels nga utok sa pagpangsunog sa mga kagamitan sa kompanyang Del Monte Philippines sa Claveria,Misamis Oriental.
Miingon si Claveria Police Station commander Maj James Bandrang nga nailhan sa mga testigo ang pipila sa mga rebelde nga mihimo sa kremin.
Sa pagkakaron,padayong gikuhaan pa sa mga testimonya ang maong mga testigo kinsa mga driver sa gipangsunog nga sakyanan sa kompanya.i
