CAGAYAN DE ORO CITY – Napiangan sa laing higayon ang utok sa illegal mining activities nga naglihok sa Purok 2,Brgy Limonda,Opol,Misamis Oriental.
Kini human nabawian sa hiniusang operasyon sa nagkadaiyang unit sa Philippine National Police ang mga sindikato sa kagamitang pang-mina nga nagbalor 333-mil 600 pesos sa lokasyon nga nalusob ang illegal mining site.
Matud ni Police Regional Office 10 spokesperson Major Joann Navarro nga maoy nangulo sa paglusob ang tropa ni Regional Mobile Force Batallion 10’s 1001st Mobile Company commander Major Benjamin Alvarez III diin nabawian sa nagkadaiyang kagamitang pangmina sa lugar.
Saysay ni Navarro nga kaabag ni Alvarez ang tropa usab sa Technical Support Company, 1005th MC,S2 RMFB10 ug Opol Municipal Police Station aron mapasayon ang paglusob sa lokasyon.
Apan wala na sila’y naabtan nga mga minero sa lugar kay posibleng nabantayan ang ilang paghidangat rason nga kabtangan na lang ang nakuha sa lugar.
Tipik sa mga nabawis ang rod mill drum, improvised pump belts, generator set, water pump, induction motor ug ubang mining equipment nga ubos sa kustodiya sa RMFB 10.
Gisaksihan nila Brgy officials Alona Grace Dauhog,Tito Fellesco ingon man mga sakop sa Mines and Geosciences Bureau nga sila Pat Cyrus Catalino ug Pat John Mark Zapico alang sa imbentaryo.
Gitakdang itugyan sa RMFB 10 ngadto sa MGB ang mga nabawing mga kagamitan alang sa tukmang aksyon.
