Gipasalig ni PRO-10 Spokesperson Police Major Joann Navarro nga pabilin nga luwas ang mga eskwelahan sa tibuok Region 10 taliwala sa mga nitumaw nga taho bahin sa school violence.
Gisaysay sa opisyal nga bisan pa man kun wala pay validated o bug-at nga hulga sa seguridad sa mga tunghaan, tanang nadawat nga impormasyon gihatagan gihapon nila og seryosong pagtagad.
Dugang pa niini, gipakatap na ang ilang mga field commander aron makig-alayon sa Department of Education (DepEd) ug mga local government unit sa pagpahigayon og threat assessment ug pagpalig-on sa police visibility sa mga eskwelahan.
Nag-abiso usab ang kapulisan sa publiko nga dili mag-panic ug direktang ireport kanila ang bisan unsang impormasyon imbes nga ipakatap kini sa social media.
