CAGAYAN DE ORO CITY – Gibisita sa mga prominteng tawo ang haya ni late Senate President Aquilino Pimentel Jr sa kauluhan kagahapong adlawa.
Miingon si PDP-Laban Cagayan de Oro Council Pres ug Gusa Bgry Kap. Marlon Tabac nga kabahin sa nakaduaw sila Executive Secretary Salvador Medialdea, former Vice Pres Teosfito Guingona, kanhi Ombudsman Conchita Carpio Morales ug daghang pang uban.
Gibutyag ni Tabac nga mismo usab si Cagayan de Oro Archbishop Antonio Ledesma ang nangulo sa santos nga misa pahinungod kang Pimentel kagabii.
Samtang gibalik-lantaw ni kapikas ni ‘Nene’ Pimentel Jr kon unsa siya kadako’g gugma.
Kini human lab-as pa sa panumduman ni Lourdes ‘Bing’ Pimentel ang kagustuhan sa kanhi senador nga mas unahon ang pagsilbi sa katawhan itandi sa kaugalingon niining panginahanglan.
Miingon si Gng Pimentel nga hinoon nasabtan niini ang gawi nga naa sa iyang kapikas hinungdan nga gihatagan niya sa suporta sa taas nga panahon.
Saksi si Gng Pimentel kon giunsa paglisod-lisod iyang bana mabarugan lamang ang ensakto batok sa mga kahiwian kaniadto ni ni kanhi Pres Ferdinand Marcos Sr.
Samtang nahuptan nang daan ni Pimentel ang kinaiya sa pagka-matarong isip lumad nga Misamisnon diin nagdako dinhi sa syudad sa iyang kapanahunan.
Kini ang buhi nga paghulagway ni kanhi Mindanao Assemblyman Atty Homobono Adaza kinsa nakasaksi sa batan-on pa si Pimentel hangtod nga nakaabot sa serbisyo sa publiko sa nasud.
Gani,mismo si Adaza ang naghimo nga politiko kang Pimentel dihang nakumbinser niini nga modagan pagka-mayor sa syudad ug gobernador sa lalawigan sa panahon pulos pa sila aktibo sa Mindanao Alliance Movement.
Sa pikas bahin,kawad-on sa nabiling statesmen sa nasud si Pimentel.Kini ang puno sa pagdayeg nga pahayag ni kanhi IBP-MisOr-CdeO chapter president Atty Ed Cuaresma kang Pimentel kinsa gi-idolo niini ang pagka-abogado ug pagsilbing public servant.
Miingon si Cuaresma nga modagan pa ang daghang katuigan ayha makabaton ang Kongreso sa laing dugo sa public servants nga prioridad ang interes sa nasud ug dili ang kaugalingon.
Si Pimentel ang amahan sa Local Government of the Philippines ug nakigbisog sa sistemang pederalismo diin kabahin niini ang paglig-on sa matag-local govt units sa nasud.
