CAGAYAN DE ORO CITY – Tutukan ni Pinoy ring icon Sen. Manny Pacquiao ang iyang nakitang kahuyang sa estilo ni unbeaten American boxer Keith Thurman sa miagi niining mga away.
Kini aron maseguro ang kadaugan niini sa ilang title fight didto sa MGM Grand Arena, Las Vegas, Nevada, USA sa adlaw’ng Domingo.
Miingon si Pacquiao nga iyang gilantaw ang away ni Thurman kontra kang Danny Garcia niadtong tuig 2017 diin midaug kini pinaagi sa split decision.
Asoy sa fighting senator nga duha ka huyang nga estilo ni Thurman ang iyang nakita nga mamahimong yawe sa iyang kadaugan batok sa American boxer.
Nagduda usab ang pambansang kamao kon mahitabo ang panghinambog ni Thurman nga dili kini modagan-dagan ibabaw sa boxing ring. Una nang gibutyag ni Pacman nga siento-porsento na siyang andam sa ilang unification fight sa Hulyo 21 ning tuiga.
