CAGAYAN DE ORO CITY-Gitahasan sa Korte Suprema ang Taguig City Regional Trial Court o Taguig-RTC nga maoy modungog sa mga kasong gilambigitan sa Maute members ug sympathizers sa Marawi City.
Gibutyag ni Supreme Court spokesperson Atty. Theodore Te nga gi-aprobahan sa mga mahistrado atol sa ilang en banc session ang hangyo sa Department of Justice o DoJ nga ibalhin sa Metro Manila ang pagdungog sa Maute related cases.
Nagtudlo usab ang korte suprema ug special intensive care area sa Camp Bagong Diwa isip temporary detention area alang sa mga dinakpang terorista.
Samtang daw naibtan sa tunok ang katawhan sa hukom sa korte suprema nga magbalhin sa mga kasong rebelyon nga giatubang sa mga sakop sa teroristang Maute-ISIS ug sympathizers dinhi sa syudad ug gibalhin sa Taguig City Regional Court.
Kini human makumbinser sa Dept of Justice kuyog ang ubang petitioners ning syudad ug lalawigan ang korte suprema nga maayo nga sa kauluhan ibilanggo ang mga Maute-ISIS aron dili madali-dali’g rescue sa mga kaubanan niini.
Gibutyag ni Atty Ed Cuaresma,presidente sa Intergrated Bar of the Philippines Misamis Oriental-Cagayan de Oro Chapter nga dili diay buta ug bungol ang korte suprema kay gipaminaw niini ang hangyo sa katawhan sa rehiyon.
Samtang dili lu-agan sa PNP kuyog ang militar ang gipatuman nga seguridad sa syudad ug silingang mga lugar sa rehiyon.
Kini bisan nga ipabalhin sa korte suprema ang pagdungog sa kasong rebellion batok sa mga teroristang Maute-ISIS nga unang nasikop sa syudad sa miaging Hunyo ning tuiga.
Namahayag si PNP regional spokesperson Supt Lemuel Gonda nga gibantayan usab nila ang pag-atake sa mga teroristang BIFF,Abu Sayyaf ug rebeldeng NPA.
Una nang giangkon ni Gonda nga dako nga suliran sa seguridad kon sa syudad dunggon ang mga kaso sa mga terorista.
