CAGAYAN DE ORO CITY-Gi-suspenso ang mga klase sa nagkadaiyang level sa tunghaang elementarya padulong sa kolihiyo sa onse ka lungsod sa Misamis Oriental.
Kini tungod sa walay hunong nga pagbundak sa pag-ulan epekto gihapon sa hanging habagat nga naka-apekto sa Amihang Mindanao.
Miingon si PDRRMO head Fernando Dy Jr nga kabahin sa mga nagsuspenso sa klase ang Jasaan; Opol, Tagoloan, Gitagum, Manticao, Claveria, Libertad, Naawan, Initao, Lagonglong ug Balingasag.
Gibasi ang suspension sa executive order no.66 diin descretion sa school principals o administrators ug local govt unit officials ang suspension ilabina kon namiligro ang seguridad sa mga tinun-an.
Suspendido usab ang mga klase sa daghang tunghaang elementarya ug sekondarya sa syudad ning adlawa.
Kini gumikan gihapon sa dala nga hadla sa seguridad sa walay hunong nga pagbundak sa pag-ulan.
Miingon si CDRRMD head Allan Porcadilla nga mismo siya ang nakig-koordinar sa kadagkuan sa DepEd-Cagayan de Oro aron masiguro nga dili makahinayak ang mga bata pagtungha sugod kaganihang buntag.
Kabahin sa mga nag-suspenso sa mga klase ang Camama-an, Iponan, City Central School, COC-Phinma, Regional Science High School, Lourdes Grade School, Liceo de Cagayan University ug daghan pa.
