CAGAYAN DE ORO CITY – Andam magbilar ang mga alyado ni Marinduque Rep Lord Alan Velasco mapasar lamang ang P4.5 trillion 2021 national budget nga unang gi-sertipikahan isip urgent bill ni Pres Rodrigo Duterte.
Kini human imando ni Duterte ang special session sugod ning adlawa hangtod Oktubre 16 aron may magamit ang gobierno sa pakigbatok sa COVID-19.
Miingon ang usa sa mga alyado ni Velasco nga si Bukidnon 4th District Congressman Rogelio Roque nga gitahas ang kamarabaha nga tapuson ang budget deliberation ug mapasar na sa 3rd and final reading ang proposed national budget.
Nagtoo si Roque nga daghang nga kabag-uhan ang mapatuman sa pagpadagan sa kamarabaha sa paglingkod sa bag-ong house speaker nga si Velasco isip hulip kang Speaker Alan Peter Cayetano.
Una niini, mitug-an si Roque nga usa siya sa 186 ka kongresista nga mipabor kang Velasco nga mahimong bag-ong House Speaker base sa “gentlemen’s agreement” nga term-sharing.
Samtang mi-distansya una si Iligan City Lone District Cong Frederick Siao sa pag-inilugay sa pwesto pagka speaker ni Cayetano ug Velasco.
Gibutyag ni Siao nga taas pa nga taas pa ang mahimong political dispute ni Cayetano ug Velasco tungod sa maong posisyon.
Gipaniguro sa maong opisyal nga ang ikaayo sa iyang distrito ang prioridad niini bisan kon kinsa pa ang mangulo sa kamarabaha.
Dugtong niini,gilauman sa political analyst Prof Ramon Casiple nga mahimong puno sa aksyon ang duha ka kampo sa mga kongresista nga mag-ilugay sa pagka-speaker sa kamarabaha ning adlawa.
Kini human pulos mi-claim si Cayetano ug Velasco nga usa kanila ang nagsilbi nga speaker.
Gibutyag ni Casiple nga bugtong maka-pugong sa duruha ang posibleng intervention ni Pres Rodrigo Duterte nga sa dili pa sugdan ang pagtuki sa 2021 proposed budget,may opisyal nang pilion ang mga magbabalaod kon kinsa ang lehitimo nga ilhong speaker of the house sugod ning adlawa.
