CAGAYAN DE ORO CITY-Barugan ni City Mayor Oscar Moreno nga dili mahikaw ug maabuso ang pagsalig sa katawhan nga gihatag kaniya aron panguluhan ang pag-alagad dinhi sa syudad.
Kabahin kini sa tubag ni Moreno dihang gipaboran sa korte suprema ang gilugwa nga mga temporary restraining order ug writ of preliminary injunctions gikan sa Court of Appeals batok sa mga dismissal ug suspension orders gikan sa Ombudsman.
Namugos si Moreno nga pagpangdaot sa iyang liderato ang gihimo sa mga kontra niya sa politika hinungdan nga ila usab kining gipangandaman.
Si Moreno,gi-dismiss sa makadaghang higayon apan napugngan kini sa Court of Appeals samtang gi-resolbar pa ang mga motion for reconsideration nga giduso niini sa Ombudsman.
Samtang mosang-at sa motion for reconsideration o subli moduso’g kaso si kanhi Taglimao Brgy Kap William Guillani batok sa mga justice sa Court of Appeals o CA nga naghatag pabor kang Moreno aron dili madutlan sa dismissal order gikan sa Ombudsman.
Reaksyon kini ni Guillani samtang gitahod usab niini ang hukom sa korte suprema diin nag-ila sa mga hukom sa CA nga ensakto lamang ug walay paghinobra sa balaod.
Si Guillani ang nagduso’g kasong administratibo batok Moreno tungod sa isyu sa tax settlement sa kompanyang Ajinomoto sa tuig 2016.
Una nang gihulat ni Puntod Brgy Kap Marvin Beja ang opisyal nga kopya sa korte suprema diin nagbasura sa iyang reklamo batok CA justices dihang gi-suspenso sa Ombudsman si Moreno tungod sa sports program niini.
