CAGAYAN DE ORO CITY – Gipaabot sa tribu Higaonon ang ilang kadismaya nga naglakip sa nahunong nga katukuran sa halos 2.4 milyon pesos nga istraktura diin magsilbing tapukanan sa tanang mga lumad kung adunay tigom sa Brgy Dansolihon ning syudad.
Kini human unang nakigkita ang tribu ni Higaonon Tribe Tribal Chieftain Datu Ontong Fidel Bisoy kang kanhi City Mayor Oscar Moreno aron ipaabot ang gamay’ng suliran nga unta matibawas na ang gipangayo nila Higaonon Center alang sa 18 ka barangay diin adunay mga lumad ang magamit niini.
Sulti ni Datu Ontong nga nahatag kadto nga proyekto sa hinapos nga bahin sa termino ni Moreno apan napahigayon ang bidding process sa pagdumala na ni City Mayor Rolando ‘Klarex’ Uy sa dakbayan.
Saysay niini nga nalipay sila sa sinugdanan kay nahatagan sa katumanan ang pagpabarog sa istraktura apan kung kanus-a gamay na lang ang kulang aron ila nang kapuslan,misulti kanila ang nagtrabaho nga malangan kini pagtibawas kay wala na’y pondo alang niini.
Kini ang rason nga gi-esplikar ni Moreno nga siya ang motibawas kung subli hataga’g higayon nga makasilbi sa katawhan sa dakbayan pinaagi sa Mayo 12 nga eleksyon.
Nagpasalig usab si Cagayan de Oro 1st District Cong. Lordan Suan nga kung kaluy-an masublian alang sa ikaduhang termino, kurambos sila ni Moreno sa paghuman sa Higaonon Center alang sa mga lumad sa syudad.
