Gilusad sa mga mag-uuma sa Don Carlos, Bukidnon ang usa ka rally atubangan sa buhatan sa Department of Agrarian Reform Region 10 kagahapong adlawa aron hingusgan ang ilang dugay na nga panawagan alang sa Certificate of Land Ownership Award kon CLOA.
Gipahibalo ni Pat Jared V. Panganithon, ang Policy and Communication Officer sa Philippine Movement for Climate Justice sa Mindanao, nga mokabat na sa 38 ka tuig ang gipaabot sa mga mag-uuma sa titulo sa yuta nga ilang gitrabaho.
Dugang pa ni Panganithon, dili lamang kini usa ka simpleng protesta kay tuyo sa Don Carlos, Bukidnon United Farmers Association, Incorporated ang personal nga paghatod og sulat ngadto sa Regional Director aron makadawat og final nga resolusyon.
Susama sa nahitabo sa mobilisasyon niadtong Hulyo 3, 2025, gikapoy na matod pa ang mga mag-uuma sa puro rason ug balik-balik nga katin-awan nga wala gayuy konkretong aksyon.
Puno sa paglaum ang mga mag-uuma nga pinaagi niining lakang, matubag na sa hingtungdang ahensya ang ilang dugay na nga mulo human sa pipila ka henerasyon nga pagpaningkamot.
