Wala na makauyon ang mga mag-uuma sa Don Carlos, Bukidnon sa grabe kahinay nga proseso og pag-usik-usik lang matod pa sa ilang panahon sa pagpangayo sa ilang yuta gikan sa Department of Agrarian Reform.
Gibutyag ni Pat Jared V. Pangantihon sa Philippine Movement for Climate Justice Mindanao nga bisan sa ilang makanunayong pag-follow up, wala gihapon nila madawat ang ilang Certificate of Land Ownership Award.
Hinuon, nagpadayon ang ilang pagsupak sa balik-balik nga revalidation nga matod pa sa grupo, makadugay lang hinuon sa pag-ila sa tinuod nga mga mag-uuma.
Tungod sa maong sitwasyon, gani nag-camp out na ang mga mag-uuma gawas sa buhatan sa DAR sa Manila aron ipadayag ang ilang kawalay paglaum samtang nagselebrar ang gobyerno sa 38 ka tuig nga pag-exist sa Comprehensive Agrarian Reform Program.
Busa, gipangayo sa grupo ang dinalian nga aksyon ug tubag gikan sa ahensya bahin sa mga yuta nga giingong nakuha na sa uban bisan og katuigan na silang nagtikad niini.
