Sa opisyal nga pag-abri karong Lunes sa pagdawat sa Certificate of Candidacy o COC, gipahimangnoan sa Buhatan sa Comelec Region 10 ang tanang magpapili nga mangandam na ug mag-fill up sa porma aron dili magdalidali sa pagpanotaryo.
Giawhag ni Regional Director Renato Magbutay ang mga kandidato nga mag-andam na sa ilang mga gikinahanglang papel sama sa birth certificate tungod sa mubo nga panahon gikan September 28 hangtod October 5.
Gipasabot sa opisyal nga suspended pa ang pagdawat sa bag-ong nagparehistro samtang gipahiluna pa ang tanang pagpangandam alang sa umaabot nga piniliay.
Dugang pa ni Magbutay, sugdan ra usab dayon nila pagbalik ang voter registration kon magpagawas na og opisyal nga resolusyon ang ilang nasyunal nga buhatan.
