Dismayado ang Federation of Free Workers (FFW) sa pag-obserba sa Labor Day karong tuiga, sumala ni Atty. Sonny Matula, presidente sa organisasyon.
Sa iyang pamahayag sa Bombo Radyo, giingon ni Matula nga wala’y pormal nga pakigkita tali sa Pangulo ug sa mga lider sa mamumuo — usa ka tradisyon nga naandan sa miaging mga administrasyon matag Mayo Uno.
Matod pa niya, importante ang maong diyalogo aron personal nga madungog sa Pangulo ang tinuod nga kahimtang ug mga problema sa sektor sa labor.
Bisan pa man adunay pipila ka informal nga pakig-istorya, giingon ni Matula nga kulang gihapon kini kung walay klarong miting nga maghisgot sa mga programa ug solusyon.
Busa, nanawagan ang FFW nga magtakda ang administrasyon og pormal nga diyalogo aron masiguro ang aktibong partisipasyon ug mas lawom nga pagsabot sa mga mamumuo sa mga polisiya sa gobyerno.
