CAGAYAN DE ORO CITY-Nagpahimangno ang City Comelec sa mga tag-as nga opisyal ning syudad nga likayan ang pagka-partisan sa nagkadool nga Barangay ug SK elections karong bulan sa Mayo.
Si City Election Officer Atty Ramil Acol miingon nga dili sila magduha-duha sa pagpasaka’g kaso sa mga opisyal nga magsilbing partisan ilabina ang alkalde sa syudad.
Apan gitin-aw ni Acol nga nasayod sila nga adunay mga mayor nga hilom nga nagsuporta sa mga barangay kapitan sa syudad.
Gihangyo usab ni Acol ang mga magpapili sa barangay ug SK elections nga dili maglangan-langan sa ilang himoong pagduso sa sertipiko de kandidatura sugod karong Abril 14 hangtud 20.
Matud ni Acol nga hugot nga seguridad ang ilang ipatuman sa ilang opisina ilabina nga gilauman ang pagdagsa sa 3-mil ka mga magpapili sa umalabot piliay.
Gani, nanawagan si Acol sa mga mo-kandidato nga dili na hulaton ang katapusang adlaw sa filing of CoC ayha sila moduso sa ilang kandidatura.
