CAGAYAN DE ORO CITY – Nanganti sa pagsilot ug pagkalagpot sa katungdanan ang command group sa Misamis Oriental Police Provincial Office ngadto sa pipila ka pulis nga mas gipili ang paghimo’g hinangal kaysa pag-alagad sa katawhan.
Gihimo ni Misamis Oriental Police Provincial Office Director Col. Chuli Jun Caduyac ang pahayag nunot sa pagkadakpi sa aktibong pulis kuyog sa tulo ka sibilyan sulod sa usa ka drug den sa Sitio Sto. Niño,Brgy Baluarte,Tagoloan sa miaging semana.
Namahayag si Caduyac kinsa lumad-Misamisnon nga dili kini makatugot nga bastuson ug panamastamasan ang dignidad sa Philippine National Police nga giampingan sa taas nga panahon sa unang mga nahimong mga opisyal niini.
Gibutyag sa opisyal nga hinoon dili target ni Tagoloan Police Station commander Capt Ralph Rexson Layug si Police Patrolman Raymart Asaytona nga taga-Mantibugao,Manolo Fortich,Bukidnon apan dismayado kini nga dugang sakop sa PNP ang nabutang sa kontrobersya.
Siya miingon nga wala palabya apan apil gikasuhan sa pagsupak sa anti-illegal drugs o Dangerous Drugs Act of 2002 si Asaytona nunot sa pagkadakpi niini sa miaging semana.
Apil sa mga gikasuhan sila Cristy Mansinaguez kinsa target sa operasyon ug laing duha nga sila Jonie Estenzeo ug Jordan Caasalan nga taga-Bukidnon ug Tagoloan sa lalawigan.
Subay sa old PNP IDs,si Asaytona ang konektado sa Regional Mobile Force Batallion 13 nga nakabase sa Caraga region.
