CAGAYAN DE ORO CITY – Naglugwa’g manifesto of support ang mga miembro sa Philippine Military Academy (PMA) Maringal Class of 1988 sa kasamtangang giatubang nga hagit sa ilang kauban nga si kanhi Philippine Drug Enforcement Agency Director General Wilkins Villanueva.
Kini human walay duha-duha nga gi-cite in contempt si Villanueva sa Quad committee sa kamarabaha kay wala makuha ang gusto nila nga tubag sa isyu sa war on drugs investigation pinaagi ni Abang Lingkod partylist Rep Joseph Stephen Paduano sa ika-13 nga hearing.
Nalatid sa maong manifesto nga gilangkuban sa mga retiradong mga heneral gikan sa mga sundalo’g kapolisan nga dili nila madawat nga bastuson lang ang ilang kauban nga adunay taas ang integridad ug nagbuhis kinabuhi sa pag-protehir sa nasud.
Miingon ang maong mga retiradong heneral nga duyog sila sa baruganan ni Villanueva rason nga nagpalugwa sila sa maong mensahe punting sa mga kongresista nga naglingkod sa komitiba.
Dumduman nga dili tiaw ang batikos nga nadawatan ni Paduano gikan sa publiko kinsa kanhi sakop sa komunista ug kumander sa grupong Alex Bongcayao Brigade ayha nahimong opisyal sa gobierno tungod sa daw paghinawod ug walay respeto sa kalmado nga heneral nga si Villanueva.
Hisayrang mo-epekto ang pag-detiner kang Villanueva sulod sa kostudiya sa kamarabaha atol sa pagbalik sa ilang regular sesyon sa Enero 2025.
