CAGAYAN DE ORO CITY – Gihimakak ni Vice Pres Sara Duterte nga mihimo usab kini’g eksena alang sa iyang politikanhong interes pinaagi sa pagbisita sa pipila ka haya sa unom ka sundalo ug sa mga samaron nga anaa sa Camp Evangelista Station Hospital sa 4ID headquarters sa syudad kagahapon adlawa.
Kini human unang gipaabot sa bise-presidente ang pasubo ug gamay’ng tabang pinansyal sa pamilya kang late Army Cpl Redland Tapinit sa Brgy Maranding,Lala,Lanao del Norte ug late Army PFC James Porras sa Agusan del Sur.
Miingon si Duterte nga sama sa ilang amahan nga si kanhi Pres Rodrigo Duterte nga kinaiya na nila nga personal duawon ang mga sundalo’g pulis kon dunay susama nga kahimtang sama sa Davao City kaniadto.
Namugos ang bise-presidente nga paagi kini nga mopalig-on sa moral sa tropa sa gobierno kinsa nagsakripisyo ug nagbuhis sa kinabuhi alang sa nasud.
Sa miaging mga semana,nakigtagbo usab si House Speaker Martin Romualdez sa kadagkuan sa AFP Eastern Mindanao Command sa Camp Evangelista diin gidudahan nga paagi sa loyalty check nunot sa kagustuhan ni kanhi Pres Duterte nga Mindanao Independence.
Samtang wala mandu-i ni Pres Bongbong Marcos apan kaugalingong inisyatiba ni AFP chief of staff Gen Romeo Brawner Jr nga molibot sa pipila ka dagkong kampo aron ika-estorya ang ilang mga sundalo dinhi sa Mindanao.
Kini usab ang pagpasabot sa heneral kon nganong gipangduaw niini ang mga sundalo sa Eastern Mindanao Command diin sakop ang 4ID,Philippine Army.
Giangkon ni Brawner nga gimanduan niya ang mga sundalo nga likayan molambigit sa mga isyu sa politika kay daghan pa sila’g suliran pag-abot sa internal ug external security sa nasud.
