CAGAYAN DE ORO CITY-Natumbok na sa National Bureau of Investigation o NBI-10 ang pipila ka negosyante nga giingong mihimo’g sabotahe sa suplay sa bugas sa mga merkado ning syudad.
Kini human naglisod ang mga konsumante sa pagpalit sa NFA rice sa mga merkado bisan nga walay mga kalamidad nga natigayon sa rehiyon.
Gibutyag ni Kag George Goking,chairnman sa komitiba sa trade and commerce committee sa konseho nga kuyog ang city price watch monitoring sa syudad,mohimo sila’g paglusob sa rice warehouses sa mga negosyante.
Kasuhan usab ang mga negosyante nga masapon ug mapamatud-an nga mitago sa mga bugas ug mihimo’g re-packing sa NFA rice diin gibaligya’g mahal nga presyo ngadto sa publiko.
Una niini,mismo si NFA regional director Dianne Silva ang mikompirmar sa Bombo Radyo nga walay pagkulang sa rice suplay dinhi sa rehiyon sukwahi sa gusto ipatoo sa pipila ka negosyante.
