CAGAYAN DE ORO CITY – Gihupay sa hugpong sa mga negosyante ang gibating kabalaka sa mga mamumu-o kon tinud-anay ba nga gipatuman sa local employers ang 1st tranche sa suhulan alang sa tanang kategorya nga nakabase dinhi sa Northern Mindanao.
Kini human ang nakalabay ang pipila ka adlaw sukad gimando sa DOLE ug RTWPB 10 ang implementasyon sa 25 pesos nga dugang kinitaan sa mga trabahanteng pribadong sa rehiyon.
Gibutyag ni Antonio Uy,presidente sa Misamis Oriental Filipino-Chinese Chamber of Commerce Incorporated nga makit-an kini nga implementasyon sa paglugwa sa payslips sa mga trabahante sa sunod nila nga suhulan.
Giangkon usab ni Uy nga sa halos 250 ka aktibong miembro sa hugpong may pipila ang nangayo’g exemption nga dili una makahatag sa umento kay pabiling naglisod pa sa pagbangon gikan sa krisis nga dala sa pandemya.
Samtang nabahin ang baruganan sa gobierno ug hugpong sa mga negosyante alayon sa sugyot nga ibalik ang price stabilization funds aron may magamit sa kanunay’ng pagtaas-presyo sa produktong petrolyo sa nasud.
Miingon si Uy nga maayo unta ang maong programa apan nabalaka kini nga subli ma-abusaran ang pagpatuman susama kaniadto.
Gibutyag ni Uy nga dili usab kaayo sila kampante nga e-suspenso ang excise tax sa pipila ka produkto kay limitado lamang nga sektor ang mabuluhan niini ug maapektuhan ang ubang mga programa sa kagamhanan.
